Стандарт, хэмжил зүйн газраас санаачлан хэмжил зүйн үйл ажиллагаа эрхлэгч аж ахуйн нэгж байгууллагын захирал, удирдлагуудтай өглөөний цай уунгаа, зангиагүй уулзалтыг зохион байгууллаа.

Уулзалтаар салбарынхаа ололт амжилтыг дүгнэхийн зэрэгцээ өнөөгийн нөхцөл байдал, тулгамдаж буй асуудлаа харилцан ярилцлаа.

Энэ үеэр Стандарт, хэмжил зүйн газрын дарга С.Батбаатар: “Манай салбарт олон ажилд анхаарч ажиллах шаардлага үүссэн байгааг та бүхэн мэдэж, ойлгож байгаа. Төрийн үйлчилгээг цахим хэлбэрээр үзүүлэх зарим арга хэмжээний талаар хэлэлцэж байна. Мөн төр, хувийн хэвшилд нэн тулгамдаж буй ажиллах хүчний хомсдол, ажлын хувиарлалт болон үнэлгээ бага байгаа нь хэрэгжиж байгаа ажлын үр дүнд муугаар нөлөөлж байгаа талаар тодотгон хэлж байна. Бүтцийн хувьд мэргэжлийн боловсон хүчнийг 1-2 дахин нэмэгдүүлэхээр хэлэлцэж, шийдвэрлэх арга замын талаар ОХУ, БНСУ, БНХАУ, Чех зэрэг орнуудтай хамтын ажиллагааны хүрээнд ярилцаж байна” хэмээн хэллээ.

Хүний нөөцийн асуудлыг шийдэх гарцын талаар Монголын Уул уурхайн хэмжил зүйн захирал Э.Ууганбаяр хэлэхдээ: “Боловсон хүчнээ бодлогоор дэмжих зайлшгүй шаардлагатай байгаатай санал нэг байна. Мэргэжлийн боловсон хүчний дутагдлыг арилгахад их дээд сургуулиудын хичээлийн хөтөлбөрт оруулах, мөн хувийн хэвшлийн сургуулиудтай хамтарч ажиллах нь зүйтэй гэдэг саналыг хэлмээр байна” хэмээн хэлсэн юм.

Уулзалтад хэмжил зүйн чиглэлээр үйл ажиллагаа эрхлэгч 20 орчим аж ахуйн нэгж байгууллагын удирдлагууд болон СХЗГ-ын дарга С.Батбаатар, СХЗГ-ын Хэмжил зүйн бодлогын газрын дарга Д.Нарангэрэл болон тус газрын бодлогын газрын удирдлага, ахлах мэргэжилтнүүд оролцлоо.