МХАҮТ-ын гүйцэтгэх захирал Т.Дүүрэнг цагдан хорьсон талаар бид өмнө нь мэдээлсэн. Түүнийг танхимын ерөнхийлөгчийн сонгуулийн өмнөх өдөр цагдан хорьсон нь олон нийтэд "зохион байгуулалттай байж болзошгүй" хэмээх хардлага төрүүлээд байсан юм. Харин Т.Дүүрэнд таслан сэргийлэх арга хэмжээ авсан талаар Чингэлтэй дүүргийн Эрүүгийн хэргийн анхан шатны шүүхийн шүүгч Г.Ууганбаатар тайлбар хийжээ. Тэрбээр  "Нийслэлийн Прокурорын газраас яллагдагч Т.Дүүрэнг Эрүүгийн хэрэг хянан шийдвэрлэх ажиллагаанаас “оргон зайлж болзошгүй, хэргийн ул мөр, эд мөрийн баримтыг зөөвөрлөх, устгах талаар үндэслэл бүхий баримт, мэдээлэл байгаа” гэх үндэслэлээр цагдан хорих таслан сэргийлэх арга хэмжээ авах тухай саналыг 2024 оны арваннэгдүгээр сарын 27-ны өдөр Чингэлтэй дүүргийн Эрүүгийн хэргийн анхан шатны шүүхэд ирүүлснийг тус шүүх хүлээн авч хянан хэлэлцэхэд, яллагдагч Т.Дүүрэнд цагдан хорих таслан сэргийлэх арга хэмжээ авах тухай прокурорын саналыг үндэслэлтэй гэж үзэн 2024 оны арваннэгдүгээр сарын 27-ны өдрөөс эхлэн нэг сарын хугацаагаар цагдан хорих таслан сэргийлэх арга хэмжээ авч шийдвэрлэсэн болно" гэв.