"Take Off" хамтлаг 20 жилийн ойгоо тохиолдуулан ''Мартахгүй" бүрэн хэмжээний тоглолтоо хийх болсон талаар мэдээлэл хийлээ. Тоглолт энэ сарын 23-нд 19:00 цагаас "Crocus Event Hall"-д болох бөгөөд Монголын үе үеийн бой бэндүүдийн төлөөллүүд ирж, ая дуугаа өргөх аж. Энэ үеэр тус хамтлагийн ахлагч Э.Сүхжаргал 20 жилийн хугацаанд хийж, бүтээсэн бүхий л шилдэг, хит дуугаа түүвэрлэн дуулах болно гэдгийг онцлов. Түүнчлэн хит дуунуудаас гадна шинэ уран бүтээлүүдээр сонсогч, фенүүддээ бэлэг барихаар бэлдсэн байна. Хамтлагийн дуучин Б.Батзолбоо "Манай хамтлагийн 20 жилийн ойд зориулан ая зохиогч Аранзаа , "Нью стар студ"-ийн Гантөр, "Никитон" хамтлагийн ахлагч Батчулаан нар шинээр дуу зохиож өгсөн. Мөн 20 жилийн түүхээ сонсогчидтойгоо хуваалцах, дурсамжаа сэргээх зорилготой учир, тоглолтоо "Мартахгүй" гэж нэрлэсэн. Тус дуугаа болон бусад хит дууныхаа хөгжмийн найруулгыг өөрчилж, шинэчлэн дуулсан" гэсэн юм. 

Тоглолтод тус хамтлагийн болон зочин дуучдын 40 орчим дуу дуулагдах бөгөөд дөрвөн цаг орчим үргэлжлэхээр төлөвлөсөн байна. 

"Мартахгүй" тоглолтын тасалбарыг "Shoppy.mn", "Ticket.mn", "EventX.mn" болон "Crocus Event Hall"-ийн билетийн кассаар худалдаалж байна.